Yuksak savodxonlik bilan kelajak sari

28.05.2019

             

 Alisher Navoiy nomidagi Toshkent davlat o‘zbek tili va adabiyoti universiteti tashabbusi Oliy va o‘rta maxsus ta’lim vazirligi, O‘zbekiston Respublikasi xalq ta’limi vazirligi, “Yagona integrator UZINFOCOM” MChJ bilan hamkorlikda o‘zbek tilining ijtimoiy mavqeyini yanada mustahkamlash va ommaviy savodxonlikni targ‘ib etish maqsadida joriy yilda uchinchi bor “Diktant.uz” aksiyasi tashkil etildi.

 

Aksiya 2019-yilning 28-may kuni Alisher Navoiy nomidagi ToshDO‘TAUda va mamlakatimizning barcha viloyatlaridagi oliy ta’lim muassasalarida o‘tkazildi. Shu kunga qadar www.diktant.uz saytida besh mingga yaqin hamyurtlarimiz ro‘yxatdan o‘tgan bo‘lib, diktantda bevosita ishtirok etish imkoniyati mavjud bo‘lmagan sayt a’zolari uchun onlayn rejimida diktant yozish imkoniyati ham yaratildi. Qolaversa, bevosita aksiyada qariyb o‘n mingga yaqin ishtirokchi qatnashdi. Joriy yilda ilk bor Surxondaryo viloyatidagi Afg‘oniston fuqarolarini o‘qitish ta’lim markazi talabalari, O‘zbekiston Respublikasi Ichki ishlar vazirligi ta’sarrufidagi Yong‘in Xavfsizligi Oliy texnik maktabi tinglovchilari va o‘zbek tilini o‘rganayotgan xorijliklar ham aksiyada ishtirok etishdi. Ishtirokchilar orasida keksalik gashtini surayotgan otaxon-u onaxonlar, endigina yozishni o‘rgangan ukajon-u singiljonlarimizdan tortib, maktab o‘quvchilari, talabalar, turli xil kasb egalari bor. Ularning barchasi o‘z savodxonlik darajalarini ushbu aksiya orqali yana bir sinovdan o‘tkazishdi.

Bir so‘z bilan aytganda, tilimiz taraqqiyotiga befarq bo‘lmagan, savodxonlikni ixtiyor etgan barcha aksiya ishtirokchilariga tashakkur.

Aksiyaning yakuniy natijalari 10 kun ichida www.diktant.uz saytida e’lon qilinadi.